martes, 9 de septiembre de 2025
O Centro Xove da Almáciga contará con profesionais da música de primeiro nivel nunha nova edición do seu ciclo de clases maxistrais “Compostela en Clave”. Leo Jiménez, Tino di Geraldo ou Pepe Bao serán algúns dos artistas participantes.
A concelleira de Dereitos e Servizos Sociais, Promoción Económica e Xuventude, María Rozas, presentou hoxe o ciclo “Compostela en Clave” acompañada polo coordinador das actividades musicais do Centro Xove da Almáciga, Guillermo Vistoso, e do técnico do departamento de Xuventude, Manuel Fernández. A tenenta de alcaldesa deu conta, ademais, do programa de residencias, “que tamén da un salto de calidade, coa incorporación de nomes tan recoñecidos como Dakidarría, De Ninghures ou The Rapants, que colaborarán en diferentes actividades do Centro Xove”.
María Rozas explicou que “estes dous programas, coa participación de artistas de primeiro nivel, teñen como obxectivo seguir mellorando a formación do talento local, porque sabemos da enorme potencialidade que teñen os mozos e mozas de Santiago e queremos axudarlles a abrir portas a todos aqueles que queren dedicarse á música”. A concelleira de Xuventude sinalou que esta aposta “vai na liña na que vimos traballando neste mandato para reforzar o Centro Xove da Almáciga, e que se vén traducindo en melloras nos locais de ensaio e no salón de actos, nun novo contrato de xestión con máis orzamento e moitas novidades para a mocidade”.
“Compostela en Clave”
O ciclo de clases maxistrais do Centro Xove da Almáciga ten como obxectivo conectar aos mozos e mozas de Santiago, e sobre todo artistas e bandas que utilizan os locais de ensaio municipais, con profesionais da música de primeiro nivel e cunha longa traxectoria artística.
En setembro haberá dous encontros: o 19 de setembro con Leo Jiménez, o que fora vocalista de Saratoga e Stravaganzza; e o día 30, con Tino di Geraldo, considerado un dos principais percusionistas de flamenco e jazz de España e que tén traballado con artistas como Paco de Lucía ou Raimundo Amador.
No mes de outubro está prevista unha clase maxistral, o día 21, con Pepe Bao, un dos baixistas máis influíntes de España que ten colaborado con artistas como Luz Casal, Barón Rojo, Medina Azahara, ou Manolo García, e que é un dos cofundadores da banda O´Funk´illo. Por último, para novembro están programados outros dous encontros: o día 4 a clase maxistral correrá a cargo de Pablo Novoa, ex de Golpes Bajos que vén de dirixir o musical Galicia Canibal e que fixo parte da banda do programa Lait Motiv de Buenafuente; e o día 11 de novembro pechará o programa o guitarrista Jorge Martínez, líder de Ilegales.
Para cada unha das sesións ofrécense un total de 50 prazas, e terán preferencia as bandas do Centro Xove e persoas que teñan entre 14 e 35 anos e estean empadroadas no Concello de Santiago. Cada evento consistirá nunha clase maxistral, cun posterior coloquio coas persoas participantes.
A actividade é de balde, pero é preciso inscribirse desde hoxe ata o 19 de setembro, enviando un correo electrónico á dirección info@centroxove.com.
The Rapants ou De Ninghures, no programa de Residencias no Centro Xove
O Centro Xove tamén tén en marcha o seu programa de residencias, co que lle da soporte a proxectos dirixidos á mocidade, relacionados coa música e as artes escénicas.
Neste curso, reforzarase a liña de traballo iniciada nos últimos meses, de maneira que bandas profesionalizadas que utilizan o Centro Xove colaboren en diferentes iniciativas dirixidas aos usuarios e usuarias, a modo de contraprestación. Así se ten realizado xa con artistas que iniciaron a súa traxectoria nos locais de ensaio da Almáciga como Fillas de Cassandra, De Ninghures ou Mondra.
Neste curso, no programa de residencias participarán o Coro da Rá, que acollerá novas voces vinculadas ao Centro Xove e colaborará nalgúns dos concertos da programación da Almáciga; Dakidarría, unha banda con máis de 20 anos de traxectoria que participará nun encontro formativo coas formacións do Centro Xove no primeiro trimestre de 2026; e De Ninghures, que realizarán un ensaio aberto nas instalacións da Almáciga e manterán un encontro cos usuarios e usuarias.
Tamén farán parte do programa de residencias a banda compostelá Sr Salvaje, que gravará unha canción cun grupo do Centro Xove e ofrecerá un tour formativo para mostrar a organización e montaxe dun concerto; Zeltia Irevire, artista invitada no Festival Lanzadeira celebrado en agosto; e The Rapants, que participará en diferentes eventos do Centro Xove e tamén nun video promocional do espazo.
