Santiago aposta por medidas estructurais para o seu modelo turístico

Goretti Sanmartín lembrou que, en materia de turismo, “traballamos con constancia, con coherencia, con visión de conxunto e, por suposto, con altura de miras, para acadar cambios estruturais, que perduren no tempo e que dean resultados duradeiros”. 

Neste sentido, a alcaldesa resumiu na súa intervención as principais medidas de calado que o goberno municipal está levando a cabo para acadar o mencionado cambio de modelo, de xeito que o turismo como a actividade económica se desenvolva en harmonía con outras actividades e coa vida diaria da poboación residente. Así, mencionou a regulación dos pisos turísticos, a moratoria das licenzas de actividade relacionadas co turismo no centro histórico durante un ano, a redacción dunha nova ordenanza de convivencia e a recente aprobación da ordenanza para aplicar o imposto de estadías turísticas.

Un conxunto de medidas que, en palabras da alcaldesa dan mostra de que “ser capital significa estar na vangarda e ser pioneiras” e que “para iso é preciso abrir o foco e andar novos camiños, e o noso fundaméntase no compromiso coa veciñanza e coa sustentabilidade”. 

Sanmartín lembrou que “para o goberno municipal o cambio de modelo turístico xa non é unha opción” e asegurou que “por iso queremos que a reflexión sobre o cambio de modelo sexa unha reflexión aberta á cidadanía, participativa e plural”.

Compostela, principal destino urbano 

Goretti Sanmartín tamén menciou os principais indicadores que sitúan Compostela como o principal destino urbano do país. Así, segundo datos do INE, en 2024 acadáronse máximos históricos en canto a estadías, chegando a 1.596.027, mentres que o turismo internacional marcou tamén un novo históricocon 807.144 estadías, superando por primeira vez ao turismo doméstico. “Isto vai na liña da transformación do modelo turístico da cidade, buscando unha demanda que achegue maior valor engadido e contribúa á desestacionalización da demanda” asegurou a alcaldesa.   

En relación a outros destinos urbanos do país, como por exemplo Vigo e A Coruña, os datos do INE amosan claramente que Compostela é o principal destino turístico do país, superando en máis de 600.000 estadías tanto as estadías de Vigo como de A Coruña.

Ademais, Compostela que tamén é o destino cunha maior tarifa diaria, segundo os “Indicadores de rentabilidad del sector hotelero” do Ine. En concreto, no 2024 superou en dez euros a Vigo e en máis de 20 a A Coruña -en tarifa diaria-. Cabe destacar que o incremento da tarifa media en Compostela no 2024 foi do 13,5%, un crecemento moi por riba do IPC xeral, que foi do 2,8%. Polo tanto, no 2024 incrementáronse tanto o número de estadías como a tarifa media diaria, amosando a fortaleza do destino.

Segunda xornada científica

A xornada “Boas prácticas para un turismo sustentable en Santiago de Compostela” é a segunda xornada científica que se realiza no marco do convenio entre Concello e USC para desenvolver traballos de investigación para a consecución do Pacto Local por un Turismo Sustentable, dentro do Plan de sustentabilidade turística de Santiago de Compostela que conta coa colaboración da Xunta de Galicia e do Ministerio de Industria e Turismo. 

Na benvida institucional, ademais da alcaldesa tamén participou o director do IDEGA, Rubén Lois, mentres que do eido universitario, participaron Rosario Navalón, da Universitat D’Alacant para expoñer boas prácticas desenvolvidas en destinos urbanos e turísticos maduros; Jesús Manuel González Pérez, da Universistat de les Illes Balears, falando da sobresaturación turística nos centros históricos de Palma e Eivissa; e Belén Pérez, da Universidad de Granada, cun relatorio sobre ferramentas participativas para a planificación turística. Ademais, tamén contou cos relatorios de Adolf Fernández, responsable de dirección do Servizo de inspección do Concello de Barcelona, que presentou os protocolos que puxeron en marcha en relación ás VUT; e César Mosquera, responsable da área de Mellora Urbana do Concello de Pontevedra, que explicou como as intervencións no  espazo público inciden na calidade de vida tanto das persoas residentes e como das visitantes.