lunes, 22 de noviembre de 2021
A concelleira de Políticas de Igualdade, Mercedes Rosón, presentou a "Semana escolar contra a violencia de xénero", que se desenvolverá entre o 22 e o 26 de novembro, e na que se inscribiron 3.454 persoas, entre alumnado e profesorado.
A "Semana escolar contra a violencia de xénero" está promovida pola concellaría de Políticas de Igualdade do Concello de Santiago, co obxectivo de afondar nun dos principais problemas da nosa sociedade, a violencia de xénero.
Con esta finalidade, o Concello de Santiago editou a novela con banda deseñada Amor amargo. O libro, escrito por Xosé A. Perozo e ilustrado por Victoria Riveiro Currais, con portada de Antonio Seijas, narra a relación de primeiro amor e de parella entre Ana e Xano que pode semellar unha situación normal e habitual entre adolescentes na fronteira de deixar de selo. Pero hai certas actitudes e comportamentos que van desencadear unha serie de problemas e espertar as alarmas nas amizades máis íntimas de Ana.
Os personaxes da historia son retratos de rapazas e rapaces, Marta, Amanda, Carlos, Luís, Lupe, Miguel..., de entre quince e vinte anos que viven un verán xuntos, como veñen facendo desde a infancia. Porén na cuadrilla hai un conflito por mor do namoramento de Ana, un amor que vai resultar amargo.
